أهداها الشاعر اسماعيل الواعرابي إلى كل نساء الكون بمناسبة اليوم العالمي للمرأة
بنت الأصل نَعمه،
سبحان اللي خلاك نجْمَه، تْلالي فأرض عْبادو،
بنت الأصل كلْمَه،
سبحان اللي خلاك حَكْمَه، و الخايبْ يعوم فْوادو،
بنت الأصل رحْمه،
مولاه شريف مولود فَملحْفه بيضا، نهار الجمعه و صبات الشتا،
و الدنيا عمرات بالما، بحال شي نُكتَه، بحال شي حَلْمَه،
حيث بنت الأصل بسْمَه،
سبحان اللي خلاَّ الجنة فالسْما، تحت قدام بْنات جوادو.
بنت الأصل المَفصَّل، بنت الحيا المأصَّل،
بحال شي وردة فسطل دزجاج، مرايتي لِّمَنْها نْطلْ:
على جنان النخل،
على شهود النحل،
ملي ريقي ينشف:
تحوَّلْ الشوفة سرقه،
و السرقة تولي جوقه
و الجوقة تولي دقه،
و دقة ... دقة ...إلى ناوي توصل،
و تَمَّ ديما كنحصلْ، حيث اللِّي بْغا لعسل يصبر
لقريس... بنات الأصل.
بنت الأصل لباسي،
ماشي مال و جاه بحال لكلام لمعروف فدوك لكلاسي.
أنا عليها يَتبْنى ساسي، و بها نرفع راسي،
و لغيرها فحْياتي ما تحنيت،
بنت الأصل بحال شي نغمه
كاتبها بيدي، ملحنها بوتار بلدي
الكلمة مشدودة بخيوط زهرية و منشوده
يا بنت الأصل أنا فقير و دراهم يومي معدوده
إنما عندي قلب كبير بحر شطآنو ممدوده،
أنا عارفك بنت الناس بلا متفهميني،
حيث بنت الأصل بيبان دارهم ديما مسدودة،
و طريق الصح واضحة،
و خليني عليك من فيبي عليا نفيبي عليك، و المكالمات غير المحدودة.
هذا هو الحب د النية،
أصلا هاذا هو الحب بالطريقة المعهوده.
إيوا ردي بالك يا البنيه
من داك الحب لجاي قاطع لبحور، و جايب معاه رسالة مسمومه
حب مكسيكي عامر بلبروده،
أفلام باسلة ينغصو، على بنادم عيشتو يخليوها مهدوده
و بلا ما نتفقصو، عند رخصو تخلي نصو،
و خلي تلفازتك ديما مسدودة.
بنادم د الأصل، لبيني و بينو،
ماشي غا كلام تكال، و لا ميعاد نشريه بمال
من بعد يومين نعاود نسول فينو،
بنادم د الأصل لكلمه عندو نقرة صافية تنبع من عينو،
و هذا هو دينو،
أصلا هذا هو الزين،
و الزين كيحشم على زينو
و الخايب كنكولو ليه... واك واك اعباد الله، غير إلى هداه الله؟
و إلى تبليت بقليلة الأصل، أش ندير؟
نصبر و نتحمل،
و إلى سولاتني أش تكون؟
نجاوب بلا مانتعطل:
الله يا ودي ؟
نتيا: بنت الأصل،
نديرك أنا فرموش عينيا
ونتحمل لعما باطل
وخا قلبي يتكوى كِيَّهْ
و نادي ياسيادي راني حاصل
ونشري لراسي عمارية
لميمة تنكفني و تكول وليدي كامل
ونزغرد و الدموع فعينيا...
وندير راسي ولد الأصل
و نعاون الشيخات فديك الغنيه
فرحي يا لالا، سعدي يا لالا، ربط وليدي بديك الربطة الزغبية...
إسماعيل الواعرابي
2011/02/12
انزكان
ليست هناك تعليقات:
إرسال تعليق